L’Ostau gascon vos desiri ua annada 2024 de las bonas !
Au plaser de vos encontrar ens las manifestacions deu Gèrs :
24 de març : Prima deus Contaires a Castin
8 au 11 de mai : Trad’envie a Pavia
29 de junh : lo Rondèu Hòra las Parets a Sent Élix
5 au 7 de julhet : Escota e Minja a l’Isla de baish
23 au 25 d’agost : Las Gasconadas a Leitora
27 au 29 de seteme : Còr de Gasconha a Lavardens
18 au 19 d’octobre : Trad’Oc’tomnales a Mielan
Datas de confirmar
Diu vos don bon jorn e bon an !
Vielha « Bona annada » de Dastròs
A vos e mes a vòstas gens
Diu vos don pro de companatge
Per póder hè trotar las dents
Òli e grèish, carn e hormatge,
E de bon vin e de bon pan.
Diu vos don bon jorn e bon an.
Per vos ténguer bon apetit
Diu vos donga quauqua causeta :
Fòrça gibièr gran o petit,
Quauque regost, quauqua sausseta
Que non i manca pas lo safran.
Diu vos don bon jorn e bon an.
Diu vos don, per dessus aquò,
De çò qu’a la milhor substància :
De vos saupiquetz a gògò,
Vin cian, vin blanc en abondància
Dab coquetas de Marsolan.
Diu vos don bon jorn e bon an.
Quan hasetz quauque long camin,
Diu vos i donga bon coratge,
Bon lotgis, bon lhèit e bon vin,
E qu’ètz guarda de pet d’auratge
E de mordadura de can.
Diu vos don bon jorn e bon an.
Contra las plojas e lo glaç
Diu vos prèsta ua bona capa ;
Mès si nat gran endalavàs
En la campanha vos atrapa
Diu vos prèsta lèu un emban.
Diu vos don bon jorn e bon an.
Que si non podetz pas guarir
De quauqua grèva maladia
E que, lavètz, calha morir,
Diu vos trobè au mens aqueth dia
Shens nat pecat, petit ni gran.
Diu vos don bon jorn e bon an.
G. Dastròs