Apèl a candidaturas ENSENHAR professor 2023/24 per l’OPLO

Pel primièr còp, l’Ofici public de la lenga occitana (OPLO) e los 4 rectorats de las Academias de Bordèu, Lemòtges, Montpelhièr e Tolosa dobrisson un apèl a candidaturas comun dins l’encastre del dispositiu ENSENHAR Professor.

ENSENHAR Professor, qu’es aquò ?

ENSENHAR Professor es un dispositiu pilotat per l’OPLO, en collaboracion amb los servicis de l’Educacion nacionala, als nivèls academic e departamental.

S’agís de formar, sus una annada escolara, d’ensenhaires e ensenhairas capables d’ensenhar l’occitan e en occitan.

Per la dintrada 2023-2024, l’OPLO assumís l’integralitat del còst de la formacion, e la remuneracion dels ensenhaires del 1^èr e del 2^nd gra es assegurada per l’Educacion nacionala e mantenguda en totalitat.

A qual s’adreça aquel dispositiu ?

Totes los ensenhaires del 1^èr gra pòdon ensenhar la/en lenga occitana. Al 2^nd gra, una abilitacion a ensenhar en occitan pòt èsser obtenguda, siá per ensenhar l’occitan com LVR, siá per ensenhar sa disciplina en occitan se s’agís d’una DNL.

ENSENHAR Professor s’adreça als ensenhaires titularis que son en pòste dins l’Educacion nacionala (1^èr e 2^nd gra) dins las acadèmias de Bordèu, Lemòtges, Montpelhièr o Tolosa.

A títol excepcional e jos resèrva de possibilitats de mutacions dins l’Acadèmia concernida, lo dispositiu se pòt tanben adreçar als ensenhaires titulars que son en disponibilitat (pas remunerats per l’Educacion nacionala) o que benefician d’un comjat de formacion fòra Acadèmia de Bordèu, Lemòtges, Montpelhièr o Tolosa.

Cossí se passa ?

Un dossièr de candidatura serà adreçat al rectorat e a l’Ofici public de la lenga occitana.

Una comission s’acamparà la primièra setmana d’abril per recebre qualques candidats.

Los ensenhaires benefician d’una descarga de cors a temps plen pendent los 10 meses de la formacion, sus la totalitat d’una annada escolara en tot alternar cors e estagis en classa.

Webinari d’informacion lo 8 de març 2023 a 16h30

Per tal de respondre a las questions dels ensenhaires, l’OPLO prepausa un webinari lo dimècres 8 de març de 2023 de 16h30 a 18h00.

Mai d’info sus la procedura